भारत की संस्कृति के लिए... भाषा की उन्नति के लिए... साहित्य के प्रसार के लिए
चुनाव / मथुरा प्रसाद 'नवीन'
Kavita Kosh से
हैवान के कान खड़ा हे
हाथ कांपऽ हे
गोड़ लड़खड़ा हे
ओकर सहारा
कुरसी पर के भुरूकबा
अउ फिल्मी सितारा
अमिताभ अ हेमा
देख रहला हे ने
कुरसी पर के सिनेमा
रामायन के राम
घूम रहले हे तमाम
अउ कर रहलो हे विस्फोट
मांग रहलो हे
न भिलनी के बैर
न सबरी के बैर
न सबरी के साग
ई चक्कर हो
कि चुनाव,
टभक रहलो हे
नेता लोग के घाव
तो सब जखम भरहुन,
इनका कुरसी पर जाय ले
सब अपना में लड़हुन
गली-गली
जय बजरंग बली
अल्ला हो अकबर
जय काली
जय दुर्गा
हे हे भिरलै,
वह देखो बहदुरा के बेटा गिरलै
असली बोट के बक्सा
हो गेलै खाली,
नकली बक्सा में
बोट पड़ गेलै जाली
जाता पात धरम,
सब बोट के कड़ाही में
हो गेलो हे गरम
न लाज न सरम
उड़ रहलो हे गरदा,
पुलिस के
गाड़ी में
तिरंगा झंडा के परदा
पिस देलकै पिस
पगला के
पकड़ के ले गेलै पुलिस
खतम हो गेलै खेला,
वोट देवै के जगह पर
पुलिस के मेला।
