भारत की संस्कृति के लिए... भाषा की उन्नति के लिए... साहित्य के प्रसार के लिए
छुतहर धीबक टारा छी / नरेश कुमार विकल
Kavita Kosh से
लहरि ने आबय लग मे जकरा
एहेन नदीक किनारा छी।
नजरि उठा केओ देखि सकय ने
सांझक एकसर तारा छी।
विरह आगि मे जरि रहलि छी
एहन एकटा फूल हम
काज ने ककरो आबि सकैछी
बाटक एहेन धूल हम
प्यास मिझा ने सकैछी ककरो
सूखल सोतिक धारा छी।
नजरि उठा केओ देखि सकय ने
सांझक एकसर तारा छी।
हमरे लेल ईं राति अन्हरिया
गुज-गुज लागय दिन मे
आगाँ केर सभ बाट बन थिक
जिनगी भेंटल रीन मे
मृगतृष्णा मे सींक पर टांगल
छुतहर घीअक टारा छी।
नजरि उठा केओ देखि सकय ने
सांझक एकसर तारा छी।।
