जंगि में बेमाना थियल सुवाल / वीना करमचंदाणी
ठीक हिन वक़्ति
जॾहिं मां
तव्हां खे बुधाए रही आहियां
जंगि जे खि़लाफ़ पंहिंजी कविता
केतिरियुनि जॻहियुनि ते थी रहियूं हूंदियूं
जंगि जे खि़लाफ़
सभाऊं ऐं सेमीनार
सियासतदान, समाज-विज्ञानी
पर्यावरणविद्, अर्थशास्त्री
बुधाए रहिया हून्दा
पंहिंजा पंहिंजा वीचार
किथे वेठा हून्दा धरिणे ते
जंगि खि़लाफ हलचल में,
किथे नारेबाज़ी थी रही हून्दी
बुश हाइ हाइ!
लादेन हाइ हाइ!!
केतिरनि जे हथनि में हून्दा पोस्टर
रतो रतु थीन्दी इनसानियत
डेखारियल हून्दी तंहिं में
कटोरा हथनि में खणण वारनि जी भीड़
ओसामा लादेन खाई रहियो हून्दो
चाहबूक तस्वीरुनि में
त किथे हॾावनि पिञिरनि जे ढिॻ ते
वेठलु
बुश ॾेखारियो वियो हून्दो
किथे बि
केरु बि
न चाहे थो
त थिए जंगि
पर थी रही आहे जंगि
थीन्दी रही आहे जंगि
ऐं अॻिते बि थीन्दी रहन्दी जंगि!
आदमखोरु पंहिंजी महफू़ज़ गुफ़ा में
आरामु करे रहियो आ
ऐं महाॿली
पंहिंजे चमाट खाधल ॻिल खे
महिटीन्दे गजी रहियो आ।
जॾहिं लखें हज़ारें
बुढा, ॿार, स्त्रियूं ऐं अनाथ
बुख सां विढ़न्दा
बमनि खां डिॼन्दा
दर ब दर भिटिकी रहिया आहिनि
हिक मुठि अन्न ऐं ॿ फ़र्लांग ज़मीन ख़ातिर
टी.वी. ते ख़बरूं ॾिसन्दो मुंहिंजो
नवंनि सालनि जो पुटु पुछे थो
छा लादेन जो बदलो अमेरीका
हिननि खां वठी रही आ?
मूं वटि जवाबु न आ को
कंहिं वटि बि कहिड़ो बि
जवाबु आ को?
