भारत की संस्कृति के लिए... भाषा की उन्नति के लिए... साहित्य के प्रसार के लिए
जाय दऽ हमर सरहद पर / उमेश बहादुरपुरी
Kavita Kosh से
तोहर पायल के झंकार गोरी हमरा नञ् लागऽ हे नीक
जाय दऽ हमरासरहद पर तोहरा से माँगऽ ही भीख
सबसे पहिले हिअइ हम ई देसवा के सिपहइया
असरा हमर देख रहल सीमा पर धरती मइया
तिलक लगा के बिदा करऽ हमरा बनाके निरभीक
जाय ....
ई प्यार करे के समय हे नञ् आ गेलइ देश पर खतरा
पहिले माय के बेटा ही फेर हिओ तोहरा भतरा
लाके हमर हाँथ बंदुक दऽ हमरा नञ् लगबऽ तूँ हीक
जाय ....
छतिया के जे दुधवा पिलइलक ओकरा से नञ् करबइ गद्दारी
हमकी देबइ जवाब ओकरा पुछतइ जब महतारी
चीर देबइ दुश्मन के छाती बना देबइ ओकरा पर लीक
जाय ...
हे बेकार हमर ई जिनगी हे बेकार जुआनी
आझ तो देबे पड़तै हमरा अप्पन अब कुरबानी
धरती मइया से मागऽ अप्पन सोहाग के भीख
जाय ...
