जाहु तूहूँ जइब पियवा पुरूबी बनिजिया / भोजपुरी
जाहु तूहूँ जइब पियवा पुरूबी बनिजिया,
राउर जोगिया, हमरी के का लेइ अइब। राउर जोगिया।।१।।
अपना के अनबे धनिया बिरही बँसुलिया,
राउर जोगिया, तोहरी के सौतिन-बिरोगवा। राउर जोगिया।।२।।
जाहु तूहूँ अनब पियवा सौतिन-बिरोगवा,
राउर जोगिया, सवतिन के बास नाहीं देबों। राउर जोगिया।।३।।
जाहु तूहूँ घनिया री बास नाहीं देब,
राउर जोगिया, दुअरे में कोठवा उठइबे। राउर जोगिया।।५।।
जाहु तूहूँ धनिया री ईंट खरकइबों,
राउर जोगिया, बगिया में तनिया तनइबों। राउर जोगिया।।६।।
जाहु तूहूँ पियवा हो तनिया तनइब,
राउर जोगिया, तमुआ के डोरी काटी देबों। राउर जोगिया।।७।।
जाहु तूहूँ घनिया रे डोरी काट अइबू,
बरवा में खोंतवा लगइबों। राउर जोगिया।।८।।
जाहु तूहूँ पियवा रे खोंतवा लगइब,
राउर जोगिया, खोंतवा में अगिया धरइबों राउर जोगिया।।९।।
जाहु तूहूँ धनिया री अगिनी घरइबू,
राउर जोगिया, दूनहूँ बेगत उड़ि जइबों। राउर जोगिया।।१0।।
जाहु तूहूँ पियवा हो उड़ि जइब,
राउर जोगिया, धनुखा चढ़ाइ जान मरबों। राउर जोगिया।।११।।
