जुल्म करे तनै घरवाली का गर्भपात करवा कै / करतार सिंह कैत
जुल्म करे तनै घरवाली का गर्भपात करवा कै
जिंदगी भर सुख पावै कोन्या बेटी नै मरवा कै...टेक
तनै जांच गर्भ की जा करवाई तेरी किसनै अक्ल मारी
मुदई डॉक्टर दोनों दोषी कानून बण्या सरकारी
सजा जेल म्हं पड़ै भोगणी जुर्माना हो भारी
पैदा होण तै पहले लड़की तनै किस कारण तै मारी
के मिलग्या बेईमान तनै सिर पै दोष चढ़ा कै
जिंदगी भर सुख...
लड़की म्हं रे तनै बावले कमी कौण सी लागी
सब अपना कर्या खावैं सैं कम तेरे हिस्से का खागी
ब्याह-शादी म्हं जो दे देगा राजी हो ले ज्यागी
तनै धरती पर ना पैर पड़न दिया तू ऐसा बण्या निर्भागी
तेरे छोरे मारै सिर मैं लाठी बोलैंगे धमका कै
जिंदगी भर सुख...
आज की छोरी छोर्यां तै एकदम आगै पावै सै
तेरे घर का धंधा संगवा कै फेर कॉलेज पढ़ने जावै सै
छोरे लिकड़े फेल कती या फर्स्ट और सैकिंड आवै सै
एन.सी.सी. की लेकै ट्रेनिंग सेना म्हं भी जावैं सै
इन छोरियां नै दिखा दिया आज टेंक और जहाज चलाकै
जिंदगी भर सुख...
ये मैम्बर और सरपंच बणै पंचायत खूब चलाती
नर्स, डॉक्टर, क्लर्क बणकै ड्यूटी खूब निभाती
जज बणकै कोर्ट मैं तेरे सभी फेसले निपटाती
लोकसभा का लड़कै इलेक्शन प्रधानमंत्री बन जाती
करतार सिंह के के गावै तनै बहोत सुणा दी गाकै
जिंदगी भर सुख...
