भारत की संस्कृति के लिए... भाषा की उन्नति के लिए... साहित्य के प्रसार के लिए
झन पीबे गांजा दारू / ज्ञानू राम भारद्वाज
Kavita Kosh से
मोर माटी के मयारू
झन पीबे गांजा दारू
दू पइसा ज़ोर के रखवे,
आही तोर काम गा।
लग जाथे थोरको चुलूक,
मन नइ माढ़े गा।
घर म नइये पइसा तब,
दूसर करा काढ़े ग।
देहे नइ सकवे तब,
होवे तय बदनाम गा।
भट्ठी म जाके पइसा ल,
पानी असन वहाथे गा।
लोग-लइका, दाई ददा,
सबों ल भूल जाथे गा।
पी पारथे तहां ले,
नइ करम काम धाम गा।
खुद तो पीथे दूसर,
घालो ल पियाथे गा।
गली घोर म आके,
गारी मार घलो खाथे गा।
तंय हर कभू झन पीबे,
बिस्की जाम गा।
गांजा दारू बीये म,
तन-मन के हानि होथे गा।
इही भर नहीं भइया,
जन-धन के हानि होथे गा।
पछीना तंय हर वहावे,
सुबे अउ शाम गा।
मेहनत के पइसा म,
अबड़ हावय ताकत गा।
बइमानी के रद्दा म,
लगे हावय फाट क गा।
मेहनत तंय हर करवे,
कटको करय सरदी घाम गा।
दू पइसा ज़ोर के रखवे,
आही तोर काम गा॥
