झप्प दिल मा इन समै ग्याइ क्वी ।
जिकुड़ि मा दै जन जमै ग्याइ क्वी ॥
बरखा की झुणमुंणाट मा सुरुक कैकि,
द्वि बून्द आंसू का थमै ग्याइ क्वी ॥
चुड़ापट्टि का घाम मा डबकणा रंवा,
स्वीलि घाम ल्हेकि डमै ग्याइ क्वी ॥
मीनत-मजुरि कैरि खून पस्यौ चुऐकी,
मौत दगड़ जिन्दगि कमै ग्याइ क्वी ॥
अफु दगड़ अफि हुंग्रा पुरणा रंवा,
अपणि खुद मा इन रमै ग्याइ क्वी ॥
मेरि माया बस त्वै जनै लगीं छाई,
“पयाश” द्वि हथुल लिमै ग्याइ क्वी ॥