डाली डाली फूल फुल्यो पात पात म फुलें / हरिभक्त कटुवाल

डाली डाली फूल फुल्यो पात पात म फुलेँ
फूल भूल्यो भँमरामा कुन्नि केमा म भूलेँ

किन होला हिजोआज बरालिन्छ मन यो
जति बाँधिराखूँ भन्छु उति उड्छ मन यो
छाया एउटा सँगै डुल्छ जहाँ जहाँ म डुलेँ
फूल भूल्यो भँमरामा कुन्नि केमा म भूलेँ

को हो छाया बनी हिँड्ने भनिदिने को होला
जिन्दगीको साथी मेरो बनिदिने को होला
वसन्तमा वन फुल्यो कुन्नि कहिले म फुलेँ
फूल भूल्यो भँमरामा कुन्नि केमा म भूलेँ