तिमीले खोले मनको ढोका खोलौँला म पनि / मञ्जुल

उज्यालो

तिमीले खोले मनको ढोका खोलौँला म पनि
मिलेर हामी सपनीजस्तै रचौँला विपनी

अँध्यारोभित्र अँध्यारोजस्तै भएर नबस
खोलेर ढोका बाहिर आऊ जुटाऊ साहस
मैले त आटेँ यो ढोका खोल्न तिमी नि खोल है
सपना होइन विपना हो यो भनेर बोल है

बाहिर घाम छ, बाहिर जून छ, फूल अनि बतास छ
मान्छेको माया प्रकृतिभरि सौन्दर्य-सुवास छ
बहादुर भई भोगौँ न हामी यो सारा धरती
अरूका लागि प्रेरणा बनाई यो चोखो पिरती