तूफान / रेंवतदान चारण
औ तूफांन उठैला अणचेत्यौ
गांव गांव नै नगर नगर सूं
आंख्यां सूं अगनी बरसातौ
फड़कातौ भुजदंड रुधिर सूं
औ विकराळ भयंकर काळरूप
महाकाळ क्रोड़ां ई घर सूं
सांपरतेक अणजांण अंणूतौ
बादीलौ बेताळ अलेखूं झूंपड़िया सूं
खेत जाव अधबिखरी ढांण्यां
मोटी मीलां री छोटी कोटड़ियां सूं
आकळ बाकळ बरसां बिलखी
अलख जगाती अलूणी आंखड़ियां सूं
नित सोसण री अणमाप सताई
भूखी तिरसी अणदीठी आंतड़ियां सूं
मुगत हुवैला छिप्योड़ी सांसां
जुगां जूंनै अंतस रै डर सूं
औ तूफांन उठैला अणचेत्यौ
गांव गांव नै नगर नगर सूं
आंख्यां सूं अगनी बरसातौ
फड़कातौ भुजदंड रुधिर सूं
औ विकराळ भयंकर काळरूप
महाकाळ क्रोड़ां ई घर सूं
काळजिये री धुकण सुळगती सांसां
खेह चढैला अम्बर सगळौ ढकजाई
फूटैला दब्योड़ौ धरती रौ लोही
राचैला रंग सुरंगी चौफेर ललाई
उफणैला नैणां सूं सात समंदर
दरसैला आंधां नै कुदरत री सबळाई
जागैला जोत रूंख रूंख जु़़द्ध करैला
टणकां री मापीजैला टणकाई
रोकैला कुण वेग प्रचंड बवंडर रौ
देखौ कुण झगड़ैला सबळ सिकंदर सूं
औ तूफांन उठैला अणचेत्यौ
गांव गांव नै नगर नगर सूं
आंख्यां सूं अगनी बरसातौ
फड़कातौ भुजदंड रुधिर सूं
औ विकराळ भयंकर काळरूप
महाकाल क्रोड़ां ई घर सूं
संकाळू सरवरियां री पाळ फूटगी
इच्छावां पांगरतां ई मांदी पड़गी
धीजै रौ अणमोल खजांनौ कियां सांवटै
सांसां रै कोथळियै तीबां जड़गी
सपनां री चकरी चढ़ घूमै सिंघासण
पण परजा री गाडी आघेटै अड़गी
रूंखां नै नागा कर दीन्हा पुरवाई
रुत आवण सूं पैला मिंमझर झड़गी
भाटा रा भगवान कठा लग पूजां
सिरैपोत छिड़ै लड़ाई मिन्दर सूं
औ तूफांन उठैला अणचेत्यौ
गांव गांव नै नगर नगर सूं
आंख्यां सूं अगनी बरसातौ
फड़कातौ भुजदंड रुधिर सूं
औ विकराळ भयंकर काळरूप
महाकाळ क्रोड़ां ई घर सूं
