त्येरिपिडा कैन जाणी माँ / अश्विनी गौड 'लक्की'
अफु नि खे निलाई त्वेन
यतिरि कुटुम्दरि खवाईछै,
अफुतु ताचि स्येरा-उखड्यूं,
घौर सैरि कुटुम्दरि सिवाळिछै।
पर त्येरिपिडा कैन जाणी माँ
त्येरिपिडा कैन पछ्याणी माँ ?
रातबियांणामा उठिदि छैतु,
पैटिगि साळि-पंध्यारा,
फुन छ्वळेगि छांस जनि
पर? कैन पूछी त्येरा बारा
पर त्येरिपिडा कैन जाणी माँ
त्येरिपिडा कैन पछ्याणी माँ ?
जु हट्टि वबरा,
घौसिन त्वेन,
पांजा पर तख तु
निबैठि,
जे बिचारन तास ख्येल्यां
घट्ट रिंग्यूंसी मजा मा बैठि,
पर त्येरिपिडा कैन जाणी माँ
त्येरिपिडा कैन पछ्याणी माँ ?
कांड्वा भूड बै घास खैंची
घ्वोच्येंणि बित् ह्वोली मां,
सैरूऽ भारु पीठिमा ल्ये,
कुसाणि बित् ह्वोलीमां।
पर त्येरिपिडा कैन जाणी माँ
त्येरिपिडा कैन पछ्याणी माँ ?
पर!
कबि नि ख्वोली गिच्ची त्वीन
अपडि पिडांद अफूंमा लुकाई
गौळि दुख हौरू द्येखी
अपडु दुख कै नि चिताई।
पर त्येरिपिडा कैन जाणी माँ
त्येरिपिडा कैन पछ्याणी माँ ?
ऐंच डांडी बीठा धार,
डाळयूं कि टुक्येंड्यू मा,
घास ल्हयौणौ बोण जाणै
कैनबि क्या जाणी माँ।
पर त्येरिपिडा कैन जाणी माँ
त्येरिपिडा कैन पछ्याणी माँ ?
सुबेर-ब्याखुनि घास ल्हये,
दूधा पर्या भौर्या त्वेन,
अफु निखै, घ्यूदूधौ लैणू,
देरादून नौन्याळु तक पौंछाई त्वेन।
पर त्येरिपिडा कैन जाणी माँ
त्येरिपिडा कैन पछ्याणी माँ ?
क्येऽळा धौर्या पकौणौ तैं,
नौना औला नतेणू तैं,
जु परदेसुमा बसिगैन,
बनाना नौना पढौणौ तैं,।
पर त्येरिपिडा कैन जाणी माँ
त्येरिपिडा कैन पछ्याणी माँ ?
जुसैंत्या पाळ्या स्याणा कर्या,
सी त्येरि बिसरि गैन,
द्येबीरूप घौर छ्वोडी,
चारुधामूमा बिरडी गैन।
पर त्येरिपिडा कैन जाणी माँ
त्येरिपिडा कैन पछ्याणी माँ ?
