थाहै हुन्न दिन के हो ? / गीता त्रिपाठी

पिएपछि सोमरस जमिदिन्छ छाती
थाहै हुन्न दिन के हो ? कैले पर्छ राति

आकाशका जूनतारा आँखैभित्र बस्छन्
सत्यकुरा छोपिदिने पर्दाहरू खस्छन्
खुट्टाहरू भूइँ छाडी उठ्न थाल्छन् माथि
थाहै हुन्न दिन के हो ? कैले पर्छ राति

आफ्नै राज्य चल्न थाल्छ अरू हुन्छन् दास
यस्तै संसार रमाइलो उस्लाई बाह्रै मास
सुखदुःख जे परे नि नशा हुन्छ साथी
थाहै हुन्न दिन के हो ? कैले पर्छ राति