दिनदिनको उतार चढाव / सुमन पोखरेल

दिनदिनको उतारचढाव विपना गाह्रो लाग्छ
ब्युँझूँ भने तिमी हुन्नौ सपना प्यारो लाग्छ

हेरिदिन्छ्यौ, मुस्काउँछ्यौ, लजाउँछ्यौ पनि
खुलिदिन्छ्यौ आफ्ना मनका सबै कुरा भनी
त्यसैले त तिम्रो मेरो बन्धन दह्रो लाग्छ
ब्यूँझूँ भने तिमी हुन्नौ सपना प्यारो लाग्छ

नजीक आई सोधिदिन्छ्यौ के छ खबर भनी
छोइदिन्छ्यौ औँलाहरूले चुमिदिन्छ्यौ पनि
कति कोमल स्पर्श यो फूल साह्रो लाग्छ
ब्यूँझूँ भने तिमी हुन्नौ सपना प्यारो लाग्छ