देखो कुदरत केरो खेल वावू कुदरत केरो खेल,
चमगुदड़ी केरो मांथा मे चमेली केरो तेल-
वावू कुदरत केरो खेल॥टेक॥
हंसें वेचारा ताकते रहलै गिद्धा दिल्ली गेल,
जेकरा पीछू उलवा वदुरा, बगुला साथें भेल,
वावू कुदरत केरो खेल॥टेक॥
चिड़िया घरो में राखै सवके सवटा सुविधा देल,
खाना पानी विजली पंखा, मेज विछौना सेज-
वावू कुदरत केरो खेल॥टेक॥
कसम खैलकै वें सांसद भवन में,
मांसों के टुकरा अव नैं लेव,
मन में आन बगल में छुरी
पेटो में गट गट निगली गेल
वावू कुदरत केरो खेल॥टेक॥
एकादसी के वापों नें जानै, चलतें रहलै वेमेल,
चिड़ियां घरो कें सरदारें नें, दिल्ली सें देलकै धकेल
वावू कुदरत केरो खेल॥टेक॥
लाज तनिक नै मनौ में आवै जनता सें भेलै वेमेल,
फेनू केना के वोट मांगै छै नेतवा भेलै चुड़ैल
वावू कुदरत केरो खेल॥टेक॥