भारत की संस्कृति के लिए... भाषा की उन्नति के लिए... साहित्य के प्रसार के लिए
देशवा के शान हो / ब्रह्मदेव कुमार
Kavita Kosh से
नया राज्य झारखंड बनलै, देशवा के शान हो।
झारखण्ड मेॅ कोयला-सोना, अबरख के खान हो॥
तकनीकी सेॅ छै सुशोभित, टाटा आरो हटिया
गोड्डा जिला के गौरव, ई सी एल ललमटिया।
ध्वजा धर्म के फहरावै, भोला बाबा धाम हो॥
झारखण्ड मेॅ कोयला-सोना
मिटतै आबेॅ बेरोजगारी, पुलकित होतै सब नर-नारी
गाँव-गाँव मेॅ सड़क-बिजली, सिंचित होतै क्यारी-क्यारी।
नया-नया योजना सेॅ, होतै निर्माण हो॥
झारखण्ड मेॅ कोयला-सोना
शहीद होलै वीर जवान, मजदूर भैया आरो किसान
आपनों आजादी खातिर, हँसी-हँसी देलकै प्राण।
सिदो-कान्हू, बिरसा-मुण्डा, भेलै कुर्बान हो॥
झारखण्ड मेॅ कोयला-सोना
धर्म निरपेक्षता आरो एकता के पुजारी
दनियां ने मानी लेलकै, भारत पड़लै सबपेॅ भारी।
चाहे चीन, चाहे अमेरिका, चाहे पाकिस्तान हो॥
झारखण्ड मेॅ कोयला-सोना
