भारत की संस्कृति के लिए... भाषा की उन्नति के लिए... साहित्य के प्रसार के लिए
देसवा कै पीर / हरिश्चंद्र पांडेय 'सरल'
Kavita Kosh से
मनई बन मनई का प्यार दे,
भेद जाति धर्म कै बिसार दे,
गंगा कै नीर गुन गाये
देसवा कै पीर गुन गाये।
हम तुम न और कोऊ तन मन से भारती,
मन्दिर अजान होय मस्जिद मा आरती,
नवा नवा जग का बिचार दे,
पंडित औ पीर का सुधार दे,
तुलसी औ मीर गुन गाये
घर घर कबीर गुन गाये।
… … देसवा कै पीर गुन गाये।
गीता कुरान औ कुरान बनै गीता,
जाव भूलि अबलौं कि दिन कैसे बीता,
काबा औ कासी बिसार दे,
दूनौ का एक रूप ढार दे,
सन्त औ फकीर गुन गाये
रंक औ अमीर गुन गाये।
… … देसवा कै पीर गुन गाये।
‘हे’ न लिखै हिन्दू न ‘मीम’ लिखै मुस्लिम
‘हे’ औ ‘मीम’ हम लिखैं एक रहैं हम तुम,
मीत बनैं सबही पुकार दे,
अरुझी लट अइसन सँवार दे,
ईद औ अबीर गुन गाये
निखरी तस्वीर गुन गाये।
… … देसवा कै पीर गुन गाये।
