धड़कन छै तार-तार / रूप रूप प्रतिरूप / सुमन सूरो

धड़कन छै तार-तार, तनी बात तेॅ करोॅ।
अनमोल तोरोॅ प्यार, तनी बात तेॅ करोॅ।

तोरोॅ मिजाज तेवर मौसम के बदलले।
हँसनी भेलै दुसवार, तनी बात तेॅ करें।

जे भूल छै ऊ भूल सें होलोॅ छै कोनो भूल,
भुलिये बनोॅ उदार, तनी बात तेॅ करोॅ!

टटका छै मँहक फूल के, भमरा के भनकबें
टटका तोरोॅ दुलार, तनी बात तेॅ करोॅ।

जिनगी छै चार दिन के, दू दिन के ई मेला
केकरा लेॅ ई गुमार? तनी बात तेॅ करोॅ!