भारत की संस्कृति के लिए... भाषा की उन्नति के लिए... साहित्य के प्रसार के लिए
धेरै देखेँ सपनाहरू / सानु शर्मा
Kavita Kosh से
धेरै देखेँ सपनाहरू
धेरै समेटेँ रङ्गहरू
इन्द्रेणीको छेउबाट देखेँ
पुतलीको प्वाखबाट समेटेँ
अटाई नअटाई पोल्टा भरी
रङ्गिन सपनाहरू बटुलेँ
अलिकति सपना यसलाई दिएँ
अलिकति सपना उसलाई दिएँ
तिमी पनि आफ्नै थियौ
अलिकति सपना तिमीलाई दिएँ
मनबाट झिकेर मनभरी दिएँ
मुटुबाट निकाली मुटुभरी दिएँ
जहाँ जहाँ खाली देखेँ मैले
त्यहीँ त्यहीँ सपना छरिदिएँ
आकाशमा ती उडिरहेछन्
मेरै सपनामा पौडिरहेछन्
सपनाले रित्तो बनाई मलाई
मेरो रित्तो मनलाई ती हेरिरहेछन्
