नइकी पतइअन में सिहरी जगा के / शशिभूषण सिंह 'शशि'

नइकी पतइअन में सिहरी जगा के,
ढरक जाला नेह चान, नैनन में आके।
सुधि साँझ तुलसी तर बार जाले दिअना,
लहसि जाला रोपल कुल्हि, हिअरा के बिअना।
अँखुआइल बिरवा पानी बिनु झुरा के।
उखी-बिखी रतिया जब करवट घुमावस,
कलि-फूल-भँवरन के चरचा चलावस,
मन के महलिया भीतर गुनगुना के।
सपना समुन्दर अस अमड़ेला मनवाँ,
कूक सुनि कोइली के बिहँसे परनवाँ,
रेत के घेरवना अस सपना ढहा के।