नईं कुंवारि ऐं फ़ौजी जवान जा ख़त / अर्जुन ‘शाद’
1. नईं कुंवारि
उहे मस्त रातियूं-उहे दिल जूं बातियूं
उहे रूह खे जे चुमण लाइ आतियूं
उहे प्यार वारियूं नियारियूं निगाहूं
कमर में लपेटियल उहे सख़्त ॿाहूं
अञा कुझु मुहबत जी दुनिया ॾिठी मूं
छॾे मूंखे भारत जी सरहद ते विएं तूं
हयातीअ जो पल पल विरह जां थी घारियां
उहे ॾींहं थोरा मां सारे थी सारियां!
2. फ़ौजी जवान
तूं मूंखे थी सारीं- मां तोखे थो सारियां
वरी तोसां के ॾींहं गॾिजी गुज़ारियां
मगर मुंहिंजी हिम्मत खे ललकार थी आ
जवाननि जी जुर्रात खे ललकार थी आ
कमर तुंहिंजी नाजु़क मूं ॿांहुंनि में धारी
लॻे पर हींअर मूंखे बन्दूक प्यारी
वफ़ादार भारत जी मिट्टीअ सां थींदुसि
खटी जंग पो तो ॾे वापस मां ईंदुसि!
3. नईं कुंवारि
खटी जंग पो मूं ॾे वापस तूं ईंदें
खु़शीअ जी ख़बर फ़खु़र सां मूंखे ॾींदें
तूं ई मुंहिंजे जीवन जो आहीं सहारो
संदम् भाॻ जो चिमकंदड़ तूं सितारो
धणीअ दरि सदा इल्तिजा मां करियां थी
वॾी उमिरि तो लाइ दम दम मङां थी
मगर मुंहिंजी दिल खे आ वहमनि वरायो
कॾहिं सूरमनि भी आ सिरुड़ो गंवायो!
4. फ़ौजी जवान
कॾहिं सूरमनि भी जे सिरु आ गंवायो
जनमु आहि तंहिं पंहिंजो सपफलो बणायो
मगर हिन्दी जोधो भी सवलो न मरंदो
वतन सां वचन हू निबाहे ई रहंदो
मूंखे पंहिंजी ताक़त में ईमानु आहे
क़ज़ा सां मरी वियुसि त अरमानु नाहे
आ मुंहिंजी इच्छा, तूं विधवा थी न घारिजि
नईं ज़िन्दगीअ जो वर्कु तूं वराइजि
5. नईं कुंवारि
अव्हां जो पढ़ी ख़तु, जिगरु ई जली वियो
अव्हां में ग़लत भावु पैदा ई किअं थियो
जवाननि में जे ख़ून भारत जो जारी
त मुंहिंजो बि नालो आ भारत जी नारी
जे तूं विएं त तुंहिंजी निशानी बि लड़ंदी
मगर हिन्दी नारी न अपमानु सहंदी
शहीदनि जी विधवा न सॾिबी ॾुहाॻिणि
उहा नारि सॾिबी सदाईं सुहाॻिणि!
6. फ़ौजी जवान
मूंखे फ़खु़र तुंहिंजी मुहबत ते आहे
वतन खां मथे जंहिं खे ॿियो की बि नाहे
वतन लाइ मरिबो, वतन लाइ रहिबो
न भारत जी इज़्ज़त ते को दागु़ सहिबो
हीअ भूमी असांजी आ ‘प्रेमनि’ जी भूमी
इहा ‘साहिबनि’ ऐं ‘हमीदनि’ जी भूमी
जिते ‘शाद’ पैदा थी झांसीअ जी राणी
उन्हीअ देश जी आ अनोखी कहाणी!
