नदी हुँ म बग्दै आएँ , बग्दै बग्दै जान्छु / मञ्जुल

नदी

नदी हुँ म बग्दै आएँ , बग्दै बग्दै जान्छु
पाएँ भने चोखो प्रीति सँगालेर लान्छु

पहाडजस्तो अडिबस्ने स्वभाव छैन मेरो
माथि-माथि चुली चढ्ने रहर छैन मेरो
जो'जो बस्छन् तलतल तिनैसँग हुन्छु
आँसु बगाई पीरैपीरको गहिराइ सुन्छु

कैले पनि चुप लाग्दिन मनको गीत गाउँछु
पीर-व्यथा बाँड्न पाउँदा साह्रै सुख पाउँछु
आफन्त हुन् माया गरी सुनिदिने मलाई
रुँदै भा'नि बग्दा बगूँ धर्ती उर्वर बनाई ।