पद 131 से 140 / कन्हैया लाल सेठिया
131.
नहीं निवड़ो ग्यान रो
अबढो समद अपार,
पार हुसी जद छोडसी
बुध विचार री लार !
132.
भोग वस्तु बांटयां कटै
कद समाज रो रोग ?
संजीवण संवेदना
करसी मिनख निरोग !
133.
एक रूंख रा पानड़ा
सै री अलगी ओळ,
उळझ मती ईं भेद में
ओ अभेद रो खोळ !
134.
दाणां कर दाणो दियो
थारो पाछो फेर,
दाता री ईं मैर नै
मंगता मिनख अंवेर !
135.
पसु पंछी चुग्गै चरै
करै राम रिछपाळ,
मिनख गूंथ कोजो फस्यो
आज काल रो जाळ !
136.
उपज कांकरो सीप में
मोती बण्यो अमोल,
एक कडूमो पण हुुवै
कूख कूख रो मोल !
137.
कांई ठा टूट्या कता
तारा लाख किरोड़ ?
पण जाणै सगळा उगै
धुरजी सागी ठौड !
138.
तिण कर आडो साच रै
बणसी झूठ अबार,
थारै भवूं बिसूंजसी
सूरज दिन दोपार !
139.
बणयो दुनियादार जे
दरब संचणो सीख,
गाळण खातर गरब नै
बुद्ध मांगसी भीख !
140.
के अभखाई जे बसै
सागै कांटा फूल ?
ओलख उंडै मरम नै
समदरसी है मूळ !
