151.
पाणी कोनी पण अठै
बही खड़ग री धार,
दी बैर्यां री तिस बुझा
रण बंक मोट्यार !
152.
पूत जण्या जामण इस्या
मरण जठै असकेल,
सूंघा सिर, मूंघा कर्या
पण सतियां नारेळ !
153.
दिन में भोभर बेकळू
सूरज खावै रीस,
बा ही लागे रात नै
लप्यो चन्नण पीस !
154.
धोरा सुवरण बोरलो
खेतड़लां रो चीर,
सदा सुहागण मरूधरा
कूख उजाळी वीर !
155.
रीत भांत जूनी नुईं
बगत बगत री बात,
पण कद छोडै परंपरा
जकी जींवती जात ?
156.
हुयो बावळो गांव सो
पड़ी कुअै में भांग,
मायड़ भासा भूलग्या
बोलै ऊटपटांग !