पिछाण / कन्हैया लाल सेठिया

जद स्यूं हुई है स्याणी
दीठ री छोरी पिछाण
फिरे है डरूं फरूं सा हुयोड़ा
आज ताईं सागे रम्योड़ा
बापड़ा बाल्गोटिया अरथ
धोलो धोलो सगलो ही
दूध हो पेली
अबे नुवें भायले
मन से सिखायाँ गेली
कांच रा टुकडा में ही
फरोवन लागगी
कच्कोल्यां'र हीरा
झूठ रे परवानें सारु
कर'र नाख दिया
साच रा लीरा लीरा
देख देख'र जायोड़ी रा कुलछ
घणु ही बले
दीठ रो पेट
बारे पड्ग्यो छोरी रो पग
अबे काईं हुवे ?