भारत की संस्कृति के लिए... भाषा की उन्नति के लिए... साहित्य के प्रसार के लिए
पीपलेश्वर नाथ / राजकुमार
Kavita Kosh से
पीपलेश्वरनाथ पीपलेश्वरनाथ, फोड़ी के एैल्हेॅ पीपरबा के
सर्वेश्वरनाथ सर्वेश्वरनाथ, गंगा नहैल्हेॅ शहरबा के
पावन बैशाख सुदी, तिरोदसी तिथिया
दू सुन्ना चार नौ, संवत रोॅ बतिया
भरल्हेॅ बरारी-अँचरबा के
पीपलेश्वरनाथ पीपलेश्वरनाथ, फोड़ी के ऐल्हेॅ पीपरबा के
भूत-प्रेत-जोगिन के, पहिनें नचैल्हेॅ
अन्धड़-तूफानों में बिजुरी कड़कैल्हेॅ
तोड़ी के कज्जल कजरबा के
पीपलेश्वरनाथ पीपलेश्वरनाथ, फोड़ी के ऐल्हेॅ पीपरबा के
बनमा-बिजनमा के, तीरथ बनैल्हेॅ
बिषधर लपेटी के, अमरित बहैल्हेॅ
जोती तोंय आठो पहरबा के
पीपलेश्वरनाथ पीपलेश्वरनाथ, फोड़ी के एैल्हेॅ पीपरबा के
पीपरोॅ के सोंड़ी सें, शकती जगैल्हेॅ
भुललोॅ-भाँगठलोॅ के, भगती जगैल्हेॅ
शम्भू तोंय गंगा किनरबा के
पीपलेश्वरनाथ पीपलेश्वरनाथ, फोड़ी के ऐल्हेॅ पीपरबा के
