भारत की संस्कृति के लिए... भाषा की उन्नति के लिए... साहित्य के प्रसार के लिए
पूजा / सत्यप्रकाश जोशी
Kavita Kosh से
सगळै दिन घर में ऐकली
म्हारै कामगर हाथ सूं
थारै तांइ एक मुगट बणायौ
काची केळ रै हरियल पानड़ा माथै
मूंघा मोती जड़िया
रेसम री आटी संवारी,
सोना रा मांडणा माड्यां,
माथै छबकाळी मोरपंख सजाई।
सगळै दिन घर में उमंगां भरती
थारी मुरली रै सोनलिया घूघरा पोया,
रूपल डोरां
चिरमी री माळा गूंथी।
म्हारा चतर खांमची हाथां सूं बणायोड़ा
मुगट, मुरली नै माळा
धारण करियोड़ा
थारा रूप नै
अंतस री आंख्या सूं
निरखण लागी।
पण सांझ पड़यां कुंज रै पड़वा में
थूं म्हारै तांई
हेमपुहप री बेणी
पोयणां पोयोड़ौ हार,
नै केवड़ै री काची कळियां रा भुजबंध
गूंथ लायौ
तौ म्हारी सगळी चतराई
मगसी पड़गी,
पांण उतरगी।
फूलां रा गै‘णां पै‘र
म्हैं जमना रै दरपण में
म्हारो रूप निहारयौ
तौ उण इदक रूप रा गुमेज में
थनै पुजापौ चढ़ाणौ बिसरगी।
थूं ई तौ दिन भर
ऐकलौ बैठ
उमंगा सूं
आंनै बणायो होसी।
