पूरा करोॅ अभियान / ब्रह्मदेव कुमार
जनगणना के कार्य छै महान गे बहिना
जनगणना के कार्य छै महान।
देशोॅ में छिड़लोॅ छै अभियान गे बहिना
जनगणना के कार्य छै महान॥
भैया-भौजी दीदी हमरोॅ सुनी लेॅ वचन हो
देश के विकास के छै, एकरा में कहन हो।
सरंगोॅ में उगतै नया विहान गे बहिना
जनगणना के कार्य छै महान॥
देशोॅ के विकास होतै, ज्ञान के प्रसार हो
मिटी जैतै हमरा सिनी के, दुखोॅ जे भरमार हो।
जनगणना छै हमरोॅ देशोॅ लेॅ जरूरी गे बहिना
जनगणना के कार्य छै महान॥
जन-जन के गिनती करी केॅ, करना छै निर्धारण हो
छुपलोॅ छै विकास के मापदंड के सब कारण हो।
छिड़लोॅ छै विकास के सब तान गे बहिना
जनगणना के कार्य छै महान॥
दस बरस के बाद ऐलै, अबकी फेरू बारी हो
सुनी लेॅ हमरोॅ ई बतिया, गामोॅ के नर-नारी हो।
सही जनगणना सेॅ मिलतै त्राण गे बहिना
जनगणना के कार्य छै महान॥
बड़ी दूरोॅ सेॅ ऐलोॅ छी हम्में, तोरोॅ दुआरी हो
जनगणना करै के खातिर, तोरोॅ अटारी हो।
सब मिली केॅ पूरा करोॅ अभियान गे बहिना॥
जनगणना के कार्य छै महान॥
