भारत की संस्कृति के लिए... भाषा की उन्नति के लिए... साहित्य के प्रसार के लिए
प्रीत री दरकार / राजूराम बिजारणियां
Kavita Kosh से
बगत पंपोळतै
हाथां सूं
छूट‘र
आंगणै बिचाळै
खिंडयोड़ै बुगचै नै
अंवेरती दादी माथै
कळछ‘र पड़ी
बीनणी-
‘‘कांई धरयो है
लीरम-लीर बुगचै में.?
क्यूं फिरोळती रैवो
आखै दिन चीथड़ै नै.?’’
कांई बतावै दादी
ओ बुगचो
कोनी फगत
फाटयो-पुराणो पूर.!
इण में-
गळगी जूण
ढळगी हाण
बळगी बाट
अर रळगी ओळूं री
आछी-माड़ी ओळ्यां.!!
जका नै
सबदां री नीं,
रैवती दरकार
फगत प्रीत री।
