भारत की संस्कृति के लिए... भाषा की उन्नति के लिए... साहित्य के प्रसार के लिए
फरेम / प्रमोद कुमार शर्मा
Kavita Kosh से
भाई सा
आप तो जरूर ई
देख्या व्हेला फरेम ...... फोटू रा !
देख्या तो आच्छी बात है
म्हानै आप स्यूं आइज उम्मीद ही।
बस
काम तो छोटौ सो है
आ देखो फोटू
इण रै वास्तै एक फरेम चाईजै।
दिक्कत ! दिक्कत है एक
आ फोटू बदळै है रूप !
कदैई बणज्यै राम
कदैई रहीम सरूप !
ईं खातर
म्हानै चाइजै एक इस्यौ फरेम
जको फोटू रै साथ बदळ ज्यावै
अर फोटू री ढाल
ढल ज्यावै।
कांई कै‘वो ?
म्हूं बावळौ हूं
बात तो थारी स्याणी है
पण थे कांई जाणौ
आइज तो असल कहाणी है
अब आप ही बताओ
आ भी कोई बात है
कै जियां ई बदळै फोटू
बियां ई उणरौ सिर झुक ज्यावै
अनै कट बी ज्यावै !
हां भाई सा !
हूं तो म्हूं बावळौ ई !
