भारत की संस्कृति के लिए... भाषा की उन्नति के लिए... साहित्य के प्रसार के लिए
फागुमा मेरी आमा / अरुणा वैद्य
Kavita Kosh से
फागुका दिन
दिनभरि नै
मेरी बुढी आमाले
झ्यालबाट बाहिर हेरिरहिन्
हेरि नै रहिन्-
ठिटाहरु, ठिटीहरु
राता, नीला, पहेंला, रङ्गीबिरङ्गी भएर
फागुमा रमाइरहेको ‘लाइभ सिन’ ।
थाहा छ् मलाई
त्यो ‘सिन’ भरि नै
मेरी आमा आफ्नै अतित रमाइन्
आफ्नै बैंशालु फागुमा फर्कीइन्
र, ती पात्रहरुसित
आँफैलाई खेलाइरहिन् मस्त ।
आफ्न दिनहरुमा
फागु खेल्नमा हुरुक्क मेरी आमा
आँगन परदेश नभइदिएको भए अहिले
लौरो घनिष्ठ साथी
नभइदिएको भए अहिले
रमझमको नातालाई मलजल गर्दै
अझै रङ्गिन्थिन सायद
अझै रङ्गाइदिन्थिन् सायद ।
रङ्गिन पाएको भए फेरि
रङ्गाइदिन पाएको भए फेरि
यो फागुको दिनमा
मेरी बुढी आमा
मनभरि खुशी छचल्किएर
उज्यालो पहाड हुन्थिन्
शिशिरमा पलाएको पालुवा भन्दा
ताजा हुन्थिन्
साँझको रक्तिम घाम भन्दा
प्यारी प्यारी हुन्थिन् ।
