भारत की संस्कृति के लिए... भाषा की उन्नति के लिए... साहित्य के प्रसार के लिए
फुन्द्या / पूरण पंत 'पथिक'
Kavita Kosh से
हमत अपणौ की छवीं लगाना छाया
खामखाँ ऐन बीचम कखा फुन्द्या।
फूल मुर्झैन धरती बी शरमाई गे
कन लग्यां छन कुहाल निरभागी फुन्द्या।
भत्त्याभंग कैरिकै उत्तराखंडौ सर्रा
छत्त्यानाश पर मिस्याँ असगुनी फुन्द्या।
बिसरी कै दूद अपणी ब्वे- इजा को
कन कना राज छन निगुरा फुन्द्या।
पितर कूड्यों की कैरिकी अहा कुदशा
माला पैरिकी,हैंसन लग्यां इ फुन्द्या।
मुखडी /जिकुड़ी की लापता ह्वैगे पछ्याण
लुंड -मुंड -तुण्ड यख बण्या छन फुन्द्या।
थकुळि माँ आग पैदा अब होण लगे
ठट्टा समझण लग्याँ इ निरसा फुन्द्यया।
बगत पूछलो जब बी छक्क्वेइ सवाल
कूण कख कुमच्याराकई लुकला फुन्द्या।
