बरुनी बघँबर मैँ गूदरी पलक दोऊ / देव

बरुनी बघँबर मैँ गूदरी पलक दोऊ ,
कोए राते बसन भगोहेँ भेष रखियाँ ।

बूड़ी जल ही मैँ दिन जामिनि हूँ जागैँ भौंहैँ ।
धूम सिर छायो बिरहानल बिलखियाँ ।

अँसुआँ फटिक माल लाल डोरे सेल्ही पैन्हि ,
भई हैँ अकेली तजि चेली सँग सखियाँ ।

दीजिये दरस देव कीजिये सँजोगिनि ये ,
जोगिनि ह्वै बैठी हैँ बियोगिनि की अँखियाँ

देव का यह दुर्लभ छन्द श्री राजुल महरोत्रा के संग्रह से उपलब्ध हुआ है।