भारत की संस्कृति के लिए... भाषा की उन्नति के लिए... साहित्य के प्रसार के लिए
बर्सु बाद / मदन डुकलाण
Kavita Kosh से
बर्सु बाद
मि घार गौं
आर मेरि
सियीं कूड़ी बीजि गे
चौक नचड़ बैठी गे
सीढ़ी हिटड़ बैठी गैन
जल्वट्युन कंदूड़ लगेन अर
खिड़की आंखी ख्वलन बैठी गैन
देलीन सेवा लगे
अर द्वार
अंगवाल ब्वटन बैठी गैन |
बर्सु बाद
मि रस्वड़ा मा गों त
रुवाणयां धुआँ हैसण बैठी गे
दिवाल भुक्की पीण बैठी गैन
धुर्प्वली आशीष दीण लगे
जनदारी गीत लगाण लगे
चुल्ला आग भुभराण लैगे
सिल्वाटा गिच रस्याण ऐगे
अर
मेरि भूख बिबलाण लैगे |
बर्सु बाद
मि पंदयरा मा गों
पाणी मा सिंवालु जम्यू छो
पनदालों गुमसुम चुपन्यो छो
मी देखी
पाणी खकलट्ट कन बैठी गे
पंदालो हर्ष मा
आँसू ब्वगाण लैगे
मिन झट्ट
छमवटो लगे
बर्सु की तीस बुझे
म्यारू ज्यू छत्त बत्त ह्वेगे
अर पंदयरो प्राण
पाणी पाणी ह्वेगे
बर्सु बाद ....... बर्सु बाद।
