भारत की संस्कृति के लिए... भाषा की उन्नति के लिए... साहित्य के प्रसार के लिए
बाँझ हो गइल बा, संवेदना के गाँव / मनोज भावुक
Kavita Kosh से
बाँझ हो गइल बा, संवेदना के गाँव
नेह हो गइल बा, बबूरवा के छाँव
प्यार-प्रीत के जमीन रेह हो गइल बा
आत्मा मरल मशीन देह हो गइल बा
लेत केहू नइखे इंसानियत के नाँव !
करे जे अगोरिया से चोर हो गइल बा
देश प लुटेरवन के जोर हो गइल बा
कोरा में के लइका के जाई केने पाँव ?
जाति-पाति,धरम के उठेला लहरिया
रोटी बिना लइका के अँइठे अंतडिया
कउवन के सभवा में होला काँव-काँव !
टुकी-टुकी गउवाँ आ टुकी-टुकी घर घरवा
घरवा में घरवा आ ओहू में दररवा
'भावुक' जिनिगिया ई लागी कवने ठाँव ?
