भारत की संस्कृति के लिए... भाषा की उन्नति के लिए... साहित्य के प्रसार के लिए
बागन बागन कहै चिरैया / बोली बानी / जगदीश पीयूष
Kavita Kosh से
बागन बागन कहै चिरैया
होइ जायो हुसियार जमाना जालिम है
जल जमीन जंगल पर काबिज
गुंडन के सरदार जमाना जालिम है
नदी पियासी ख्यात भुखाने
बिरवा सुलगैं तर ते
डग्ग डग्ग पर पौरुखु
माफी मांगि रहा डालर ते
दिन पर दिन गरमाय रहा है
लासन क्यार बजार जमाना जालिम है
लालच के पंजन मा फंसिगै
सुआ जैसि या धरती
कट्टाधारी रोजु होति हैं
राजनीति मा भरती
होरी धनिया की नट्टी पर
टेइ रहे तलवार जमाना जालिम है
कउनौ अजगरु लीलि रहा है
हरियाली खुसियाली
गंगा बनिगै मानौ
मैला ढ्वावै वाली नाली
अमरीकी बादत ते छूटै
तेजाबी बउछार जमाना जालिम है
बखत समरुआ बाजा जइसन
आजु बजि रहा भइया
नयी लड़ाई बल्दी फिरि
मैदान सजि रहा भइया
याक जंग फिरि लड़बै
चाहै बीतैं बरस हजार जमाना जालिम है
