भारत की संस्कृति के लिए... भाषा की उन्नति के लिए... साहित्य के प्रसार के लिए
बीज / जीवकान्त
Kavita Kosh से
बीज लेल थोड़ जगह
छोड़बा लेल तैयार रहैए धरती
ओहि ठाम पहुँचैत अछि पवन
स्वयं सेवक बनि
मेघक एक खण्ड होइए हाजिर
सूर्य अपन ताप लए
जगबै छथि बीजकें
एतबा खेल चलैत अछि
थकैत नहि छथि सूर्य
धरती ओछ नहि होइ छथि
बसात तकने फिरैत अछि परसर
बेगरता पर जुमैत अछि
गाछ लागल अछि काजमे
एक-एक पात कए बढ़ैत अछि निरन्तर
ओ फूलकें समृद्ध करत कुण्डाबोर रंगसँ
आकाश-पाताल एक कए छोड़त एग
सूर्य नहि थकलाए-ए
बसातक वेग नहि भेल-ए मन्द
धरती कृपण नहि भेलीह-ए
बीज परिपक्व करबामे भिड़ल-ए गाछ
कान्ह नहि झाँखत
जुआ नहि खसाओत
अपन प्राण दए ओ
पुष्ट करत बीज
