बुढ़ापो / नामदेव ताराचन्दाणी
बुढापो यानी
पढ़ी चुकल अख़बार
या ठरी वियल चांहि
जणु हारिजी पियलु खीरु
या विसामी वियल अगरबती!
बुढापो यानी - दुनिया जो नक़्शो
या, झुकी वियलु जहानु
ॼणु संसार जो पाड़ेसिरी
या उझामियलु ॾीओ।
बुढापो यानी -
परे खां बुधिजन्दड़ शंख
या मंदर जी धुजा
या लठि जी महिरबानी
या टुटलु को चश्मो!
बुढापो यानी -
ज़मीन ते किरियल गुल
या विरले कमि ईन्दड़ दगु
ॼणु हिकिड़ो ख़ाली पुड़ीको
या अध-विसामियल ॿीड़ी!
बुढापो यानी - हिकु ख़ाली माचीसु
या को टुटलु आईनो
ॼणु का अणसिखियल ॿोली
या हिक गुज़री चुकल कहाणी!
बुढापो यानी -
हिक बिना लफ़्जनि जी ॿोली
या हिकु रुधलु कमरो
ॼणु ख़ाली कमरे में हलन्दड़ पंखो
या को सिमन्दडु नलको!
बुढापो यानी - कटु खाधलु पींघो
या हैंडिल भॻलु कोपु
ॼणु हिक झटका खाईन्दड़ ट्यूब लाईट
या को चिठीअ बिना लिफ़ाफ़ो!
बुढापो यानी - परनि बिना को पखी
या लाचार सुञाणन्दड़ माइट
ॼणु अकेले जो ओजाॻो
या हिकु विसिरियलु सुपनो!
बुढापो यानी -
अखियुनि में सुकलु को समुंडु
या कंहिंजो न कयलु सडु
ॼणु आकाश जो पड़ाॾो
या जवाब ॾिनल कन!
बुढापो यानी - कबीर जो बुदबुदो
या सूरदास जो पदु
ॼणु तुलसीदास जी दया
या को मीरां जो भॼनु!
बुढापो यानी-
पुरुषोत्तम महीने जी कथा
या गीता जो फाटलु पनो
ॼणु वालीअ जो तीरु
या भीषम जी सेजा!
बुढापो यानी-
सहदेव जो सदमो
या अर्जुन जो अज्ञानु
ॼणु द्रोपदीअ जी उलझन
या गांधारीअ जूं अखियूं!
बुढापो यानी-
सुबूह जो चंडु
या शाम जी आरती
ॼणु ऊंदहि में इंतज़ार
या हकीम जी परहेज़!
बुढापो यानी-
समौझतनि जो इतिहासु
या माज़ी ऐं हाल जी उफ़क़
ॼणु संसार जी संध्या
या ॾरियल का दीवार!
बुढापो यानी- वापराइजी वियलु वरदानु
या क़बर जी खॾ
ॼणु ललाट जो शिलालेखु
या मौत लाइ ॻायल का लोली!
