भारत की संस्कृति के लिए... भाषा की उन्नति के लिए... साहित्य के प्रसार के लिए
बोलो मीठा बोल / कमल सिंह सुल्ताना
Kavita Kosh से
सबदां माय मिळावणो,अपणापे रो घोल ।
मिलियाँ पण नी पांतरै, बोलो मीठा बोल ।।१।।
आखर मधरा ओपता,ताकड़ियाँ में तोल ।
नेह बहै जिण नाळियां,बोलो मीठा बोल ।।२।।
ऐड़ा सबद उकेरणा,ढम ढम बाजै ढोल।
मन रीझै हद मोकळा, बोलो मीठा बोल।।३।।
कंजूसी नी बरतणी,केणों हिवड़ो खोल ।
अंतस सीधा ऊतरै,बोलो मीठा बोल ।।४।।
कोयल ज्यूँ ही बोलणो,कागा रो नी मोल।
मनमोही अर मोवणा,मीठा बोलो बोल ।।५।।
बिना प्रेम सूँ बोलणो,नैया डांवाडोल ।
साँभल नै पतवार तूँ,बोलो मीठा बोल ।।६।।
मीठे मन रा मानवी,बरसां उठै हबोल ।
अंते में छप जावसी,बोलो मीठा बोल ।।७।।
हेत सूँ जकड़ सांवठा,गूँजा मेळ किलोळ ।
बरसां तक नी वीसरै,बोलो मीठा बोल ।।८।।
सोच समझ नैं खरचणां,आखर है अणमोल ।
मोल नही व्है आखरां,बोलो मीठा बोल।।९।।
सबद घाव नित तड़पते, रैवै मन नित झोल।
बोल्यां पेली विचारणो,बोलो मीठा बोल ।।१०।।
