भगवती-गीत / राजकुमार
कौनें रोपलकै गे मैया, अमवा-जमुनमाँ गे
कौनें रोपलकै गे मैया, नीम गे
कौनें रोपलकै गे मैया, चन्दन बिरिछिया गे
जेकरा में सँपवा लपटाय गे
भगताँ रोपलकै गे मैया, अमवा-जमुनमाँ गे
भगतिन रोपलकै, गे मइया, नीम गे
हंसा रोपलकै गे मैया, चन्दन बिरिछिया गे
जेकरा में सँपवा लपटाय गे
कौनें रोपलकै गे मैया, बेलबा बिरिछिया गे
कौनें रोपलकै बंस-बेंत गे
कौनें रोपलकै गे मैया, बरबा पिपरबा गे
जैं पर चिरईं चहचहाय गे
भगताँ रोपलकै गे मैया, बेलबा- बिरिछिया गे
भगतिन रोपलकै बंस-बेंत गे
हंसा रोपलकै गे मैया, बरबा-पिपरबा गे
जैं पर चिरईं चहचहाय गे
कौनें रोपलकै गे मैया, अनरा बिरिछिया गे
कौनें रोपलकै अमरूद गे
कौनें रोपलकै गे मैया, केलबा के गछिया गे
जेकरा पर सुगबा मँड़राय गे
भगताँ रोपलकै गे मैया, अनरा बिरिछिया गे
भगतिन रोपलकै अमरूद गे
हंसा रोपलकै गे मैया, केलवा के गछिया गे
जकरा पर सुगबा मँड़राय गे
कौनें रोपलकै गे मैया, बेलिया-चमेलिया गे
कौनें रोपलकै हरसिंगार गे
कौनें रोपलकै गे मैया अड़हुल के गछिया गे
चरनोॅ पर तोरोॅ अगराय गे
भगताँ रोपलकै गे मैया, बेलिया-चमेलिया गे
भगतिन रोपलकै हरसिंगार गे
हंसा रोपलकै गे मैया अड़हुल के गछिया गे
चरनोॅ पर तोरोॅ अगराय गे
के छै ई भगता गे मैया, के छै भगताइन गे
के मैया धरती-असमान गे
के मैया नदिया-बिरिछिया, चिरईं-सुगनमा गे
के मैया हंसा पर सहाय गे
तोहीं छै भगता गे मैया, तोहीं भगताइन गे
तोहीं मैया धरती-असमान गे
तोंहीं मैया नदिया-बिरिछिया, चिरईं-सुगनमा गे
तोहीं मैया हंसा पर सहाय गे
