भारत की संस्कृति के लिए... भाषा की उन्नति के लिए... साहित्य के प्रसार के लिए
भाग्यले ओराल्न सक्दैन / सुमन पोखरेल
Kavita Kosh से
हरेक पल बाँच्नै पर्छ मन नपर्दा फाल्न सक्दैन
जीवनबाट एकै पल कसैले निकाल्न सक्दैन
दिन रात बिताउन गाह्रो पूरा जीवन के होला
बुझिसकेँ यो जिन्दगीले मलाई पाल्न सक्दैन
अर्काको बुईमा अर्जेको सम्मान ढल्दछ ऊसँगै
पौरख गरी उक्लिनेलाई भाग्यले ओराल्न सक्दैन
संसार नै फाँड्नु पर्छ मनलाई दह्रो बनाइराख
सुकोमल हृदयले त मायामा हाम्फाल्न सक्दैन
छियाछिया भइसक्यो मुटु भत्केको छ जताततै
कसैको मुस्कानले अब यो मुटु टाल्न सक्दैन
जहाँजहाँ जानु थियो तिमीसँगै गई नै सक्यो
यो मनलाई अब अरू कसैले बराल्न सक्दैन
वेगले धड्केको यो मुटु सम्हाल्नै गाह्रो भैसक्यो
मन गरे तिमी एक छौ, अरूले सम्हाल्न सक्दैन
अझै कति रुन्छस् सुमन ! छुटेको माया सम्झी
जीवनभरको आँशुले त्यो घाउ पखाल्न सक्दैन
