भारत की संस्कृति के लिए... भाषा की उन्नति के लिए... साहित्य के प्रसार के लिए
लोक संगीत
कविता कोश विशेष क्यों है?
कविता कोश परिवार

भावी बुहारीप्रति / मुकुन्दशरण उपाध्याय

Kavita Kosh से
यहाँ जाएँ: भ्रमण, खोज

छोरो मेरो अब त वय ले आठ लागेर आयो
एक्लै आफ्ना गुरु सित गई पाठ मागेर आयो
ठूलै मान्छे हुन अब यहाँ देख्छु एस्को तयारी
के गर्दै छौ तिमि पनि कतै जन्मियौ कि बुहारी !

जन्मेकी छौ यदि कहिँ भने दिन्छु आशीष बढ्नू
हुर्केकी छौ यदि कहिँ भने दिन्छु आशीष पढ्नू
गर्दै जानू प्रति दिन जगत् चिन्न लाई तयारी
भोली लाई कठिन नबनोस् विश्व मेरी बुहारी !

के गर्दै छौ पुतलीऽ बटुली खेलिराख्छ्यौ कतै कि ?
क्यै भन्दै मा लडिबुडि गरी रोइराख्छ्यौ कतै कि ?
आजै केही तिमि सित कुरा गर्न पाए नि हुन्थ्यो !
कस्ती हौली अलिकति कतै देख्न पाए नि हुन्थ्यो !

तिम्रा बाबा सरल मन का छन् कि छैनन् कसो छ ?
तिम्री आमा कुशल गृहिणी छन् कि छैनन् कसो छ ?
जे जे होलान् तर पनि तिमी पढ्न खोजी दिए है !
चाचा भन्दा कलम कविता कापीऽ रोजी लिए है !