भीड़ सुठी आ ॻाल्हि वणे थी / अमुल चैनलाल आहूजा ‘रहिमी’
हाल अंदर
माण्हु हाल में हुआ
या बे हाल
पतो न थे पियो
अल्बत
हाल भरियल हो
वारे वारे सां
हरको थे खिलयो
ऐं तंहिं बहिद
शायद
अंदर में थे रुनो
उन्हिन ई वीचारनि में त
ॼाणि विछड़ंदासीं
अलाऐ वरी कॾहिं मिलंदासी।
स्वार्थ ख़ातिर सोच जारी हुई
छा
हिन क़िस्म जा प्रोग्राम
साल बजाइ
महिने महिने या रोज़ नथा थी सघनि?
पक सभिनी जी पंहिंजी पंहिंजी बुख मिटजे
अवल अवल अॼु जे नेता खे हारु पियो
हू मुरुकियो
ऐं
हशाम माण्हुनि जा ॾिसी हुन चयो
भीड़ सुठी आहे
ॻाल्हि वणे थी
आहे इहा एकता दाइमा या न
वास्तो नाहे तिर जेतरो असां जो इन सां
पर भीड़ सुठी आहे
इहा असां जो अनु धनु ऐं कनु सभु कुझु आहे
मन असां जो मोर जियां नचे थो
भीड़ सुठी आहे
ॻाल्हि वणे थी!
पोइ आयो वारो शाइर जो
जंहिं शइर पढ़हियो
ख़बर न खु़द खे पियस
न भर में वेठल ॿिऐ शाइर खे
त छा चयो आहे हुन पंहिंजे शइर में
बहिद शइर
रखियो वयो पोइ शाइर खे
ॿियन शाइरनि सां गुॾु
चई वेठो खु़द बि शाइर खु़द खे
शाइर सुठो माहिर आहे
छा त शइर चयो अथसः
भीड़ सुठी आहे
ॻाल्हि वणे थी!
