भारत की संस्कृति के लिए... भाषा की उन्नति के लिए... साहित्य के प्रसार के लिए
भीतर सें करथौं आघात / कैलाश झा ‘किंकर’
Kavita Kosh से
खैथों-पीथौं साथे-साथ।
भीतर सें करथों आघात॥
मुखड़ा पर जेहनऽ नकाब छै, लागै लोगवा लाजवाब छै
पोर-पोर काँटऽ सें भरलऽ, रूप-रंग में उ गुलाब छै
सटलहो जखने ओकरा में तों
लानथों विपदा के सौगात।
अंग-अंग में जहर भरल छै, तनिक सुधा सँ ठोर गढ़ल छै
साथी नै बनबऽ तों ओकरा, ओकरे कारण फेर लगल छै
फुलते-फलते रहै बाग ई
आबे आँख में बरसात।
बसें बेसी द्वेष-भावना, उलझल छै साहित्य-साधना
आगू जों बढ़भो ते मिलथों, डेग-डेग पर सिर्फ वेदना
लेखक के दुश्मन छै लेखक
अपने के मानै निष्णात।
फीकऽ साहित्यिक अधिवेशन, कुटिल चाल कुत्सित सप्रेशन
ओजहा-गुणी के मंतर सें, सरस्वती-सुत में डिप्रेशन
गुटबाजी के कारण आबे
कवि-लेखक के जाय छै जात।
खैथों-पीथौं साथे-साथ।
भीतर से करथौं आघात॥
