भारत की संस्कृति के लिए... भाषा की उन्नति के लिए... साहित्य के प्रसार के लिए
मदारी / मोनिका गौड़
Kavita Kosh से
मजमै रै करतब में गुम
मदारी री डुगडुगी में
भरमीज्योड़ी भीड़
पीटै ताळी
हरखै
किलोळ करै
पईसा काढै मदारी
जमूरै री जेब सूं
ऊंधै गिलासां हेठै सूं
भीड़ पीटती ताळी
बिसर जावै
खूंजै में पड़ी चिंतावां साथै
टैम री चिल्लर
मदारी काट रैया है जेबां
निकाळ रैया है
चेतना रै खूंजै धर्योड़ी समझ
घाल रैया है
खिणेक री झूठी मुळक
वादां रा नकली नोट
सतरंगी सुपनां री
चिळकणी गिन्नियां
भोडक्यां हालै
अेक लय ताल
जमूरै री ठौड़
आपोआप गळ में
घाल लेवै रस्सी
हरखै मतोमत
खाली खोपडिय़ां
नकल करै
विचारै नहीं
हड़-हड़ हांसै
मदारी...।
