भारत की संस्कृति के लिए... भाषा की उन्नति के लिए... साहित्य के प्रसार के लिए
मनख री पैयाण / कुंजन आचार्य
Kavita Kosh से
घणो भण्यो
घणो हमज्यो
पण मनखां में ओलखवा री बात पे
मूं चक्कर खाई जाऊं।
मनख जमारो मल्यो
तो घणा राजी विया।
चौरासी लाख योनी रा फेर में
घणा जीव दोरो विया।
बात विचार
खबर समीचार
सन में खूब गोता लगाया
पण मनखां रा अजब वैवार
हमज नीं आया।
म्हारी नानी मा कैव‘क
मनख री पैचाण करवा री
तरकीब ई होणी जरूरी है।
या तरकीब नी आवै जद
मनख-मनख में दूरी है।
पल-पल बदळतो मन
अर पल-पल बदळता वैवार
मनख री रीत एक पल अणी द्वार
दूजे पल बणी द्वार।
बदळाव तो जग री रीत है
अणी रीत सूं मन नै समझाऊं
पण मनखां ने ओळखवा री बात पे
मूं चक्कर खाई जाऊं।
