मनोॅ नै भावै आबेॅ महल अटरिया हे / राम शर्मा 'अनल'
मनोॅ नै भावै आबेॅ महल अटरिया हे
मनहुं नै भावै आबेॅ जेबर गहना
हमरा माँटी राजस्थानी मंगाय देॅ सजना
तबेॅ पूरा होतै हमरो मनोॅ रोॅ सपना
कुटी बिछी फटकी डोकी सानबै माँटी हे
नाँपी जोखी लोइया रोॅ धरबै पाँती हे
धारा पाती सबकेॅ सुखैबै अंगना
देखियो रं रं मुरती गढ़बै सजना
रोगन आसामी नकाशी कश्मीरी
सूतोॅ पंजाब के मद्रासी धूरी
डंडा मराठी मंगाय देॅ सजना
है बिहारॉे केॅ चाक बनैबै सजना
ताँडव करैवाला गढ़बै नटवर हे
राम लखन आरो कृष्ण योगेश्वर हे
अर्जुन भीम कर्ण गढ़बै सजना
बजरंगी बलराम गढ़बै सजना
एक सें एक गढ़बै बीर मरदाना हे
बीर शिवा जी महावली मरदाना हे
दानवीर भामा शाह बनैबै सजना
अलबेला जयमल फत्ता गढ़बै सजना
तेग बहादुर मसीदास त्यागी हे
रामदास शिरोमणी बंदा बैरागी हे
गुरु गोविन्द के झाँकी बनैबै सजना
आरो जलियाँवाला बनैबै सजना
मंगल पांडे भगत बटुकेश्वर हे
खुदीराम धींगड़ा सुभाषचंद्र शेखर हे
जय प्रकाश नारायण बनैबै सजना
वीर सावरकर पटेल गड़बै सजना
गुजराती पगढ़ी द्रविड़ मधु चानन हे
उत्कल कुरता मेवाड़ी मूंछ भावन हे
रुचि रुचि सब केॅ सजैबै सजना
सबकेॅ बंगला पाड़ धोती पिन्हैबै सजना
विंध हिमालय सें कूची मंगबैबै हे
अनल तापोॅ में सबकेॅ पकैबै सजना
फेनू प्रान प्रतिष्ठा करबै सजना
तै पर रंग केशरिया चड़ैबै सजना
