भारत की संस्कृति के लिए... भाषा की उन्नति के लिए... साहित्य के प्रसार के लिए
मन के कुंदरा मा आजा रे संगवारी / शकुंतला तरार
Kavita Kosh से
मन के कुंदरा मा आजा संगवारी रे मोर
छानी छाबो मया के दूनो बइहाँ ला जोर
मोर आंखी के पुतरी मा बइठे हवस
मोर हिरदे के दसना मा ढलंगे हवस
झटकिन आजा तय संगी लुकाए कती
तोर मया के खजाना चोरावय झिन चोर
छानी छाबो मया के दूनो बइहाँ ला जोर
मोर साँसा चलत हे तोरेच नाव ले
मोर आसा के दीया तोरेच ठाँव ले
गुड़ी मोर घर देंवता बन के आजा गोई
बीच भंवरी मा डोंगा ल झन तय चिभोर
छानी छाबो मया के दूनो बइहाँ ला जोर
तय जे किसना होते राधा बनतेवं संगी
सुनके बंसरी के धुन ल हो जातेवंबही
तोर जिनगी के खूटा मा दँवरी बनतेवं
रद्दा देखत झिन टूटय ए जिनगी के डोर
छानी छाबो मया के दूनो बइहाँ ला जोर
