भारत की संस्कृति के लिए... भाषा की उन्नति के लिए... साहित्य के प्रसार के लिए
मन भँवरा / पीसी लाल यादव
Kavita Kosh से
मन भँवरा, मन भँवरा, चारों मुुड़ा घूम आबे।
गुनगुन गुनगुन गीत पिरित के गा के झू जाबे॥
लोक कला के फुलवारी म,
महर-महर फूले फुलवा।
मया-पिरित डोरी बांधे,
जिनगी ह झूले झुलवा॥
दया-मया के गीत झरे, मीठ बोली चूम जाबे।
मन भँवरा, मन भँवरा, चारों मुुड़ा घूम आबे॥
अंधियारी ह लिलय झन,
पिरित के दिया बाती ल।
जनम जुग जतन कर जोही,
अपन पुरखौती थाती ल॥
कला के सुघरई भरोसा, ओला-खोला घूम आबे।
मन भँवरा, मन भँवरा, चारों मुुड़ा घूम आबे॥
करमा ददरिया सुआ-पंथी
नाचा गम्मत अनमोल धरोहर।
जस फाग पंडवानी-डंडा,
कहाँ कोनो एखर बरोबर॥
माटी के महमई हर बगरे, दे के अइसे हूम आबे।
मन भँवरा, मन भँवरा, चारों मुुड़ा घूम आबे॥
