मस्तानो शहीद / हूँदराज दुखायल
ख़ून जी बरसात बरसे, भलि तिखी तलवार मां,
ख़ून जूं धारुं छुटनि, भलि जिस्म जे हर तार मां।
ख़ून जो फूहारो छुटके, खंजरे खूंख्वार मां,
ख़ून ई वहंदो रहे, बस तेग़े जौहरदार मां।
पंहिंजे गर्दन खे झलींदुसि जुल्म जे शमशीर ते,
पाण खे सौंपे छॾींदुसि संगदिल तक़दीर ते।
ख़ून नाड़ियुनि मां कढी ॿलिदान ॾे तलवार खे,
ख़ून जी खोराक ॾे भलि तेग़े जौहरदार खे,
ख़ून जे करि रंग सां भलि लाल दर दीवार खे,
ख़ून जो खुश रंग ई पुख़्तो कंदो इकरार खे।
दुष्ट तोखे राॼ दौलत ते वॾो अभिमान आ,
याद रखु मुंहिंजो बि ही तनु देस तां कुर्बान आ।
जे गुलामीअ जो थिए कुछ जान मुंहिंजे ते असर,
भलि त अहिड़अ जान ते कड़की पवे क़हरी पत्थर,
देर छा जी आहे ज़ालिम जल्दु करि केराइ सिर,
शौक सां मरंदुसि जे मुंहिंजो काल टोड़ींदो जिगर।
मूं कयो मंजूर ज़ालिम जान खे बेजान करि,
तूं न मुंहिंजीअ नौजवानीअ ते ज़रो अरमान करि।
चार सौ चिणंगूं उॾियूं ऐं थियो ज़मीन ते ज़लज़लो,
ज़ुल्म जे तलवार खां चौधर मची वियो थरथिलो,
हाय! माता गोद ख़ाली वियो करे अॼु लाॾलो,
पियो समूरो साब ज़ालिम जो सिटियो हो सिलसिलो।
ऐ ‘‘दुखायल’’ थी शहीदीअ खां हकीकत सा अयान,
कीन आलम खां कॾहिं विसरी सघे जंहिंजो बयान।
